მოხარულები ვართ მოგიწვიოთ ფემინისტი უფლებადამცველის და კინორეჟისორის, ლია ჯაყელის თარგმანების კრებულის პრეზენტაციაზე. ვლადიმირ ჰოლანის “ადამიანის ხმა” ლია ჯაყელის და “ქალთა ინიციატივების მხარდამჭერი ჯგუფის” თანამშრომლობით 2019 წელს გამოიცა. ამ კრებულს თავიდანვე მძიმე ბედი ერგო და ქვეყნის შიდა თუ გარე კრიზისების, რუსული ძალების უკრაინაში შეჭრის, პანდემიის თუ სხვა დაბრკოლებების გამო ამ მომენტამდე თითქოს პოეზიის დრო ვერ გამოინახა. თუმცა დღეს, არანაკლებ რთულ პოლიტიკურ კრიზისში განსაკუთრებით მნიშნველოვანი და ძვირფასი გვგონია ყველა ღონისძიება, რომელიც თავისუფალი ხელოვნებისათვის სივრცეს ქმნის. ამ თარგმანების გამოცემას, რომელთა უმეტესობაც პირველად ქვეყნდება, ორმაგი დატვირთვა აქვს ჩვენთვის. გარდა იმისა, რომ ქართველ მკითხველს საშუალება მიეცემა, მშობლიურ ენაზე გაეცნოს დიდი ჩეხი პოეტის შემოქმედების მნიშვნელოვან ნაწარმოებებს, ეს ერთგვარი შეხსენებაა ჩვენი თავისთვის, რომ ხელნაწერები არ იწვიან, ისევე, როგორც ფურცლები, ჩვენი ოქროს დღიურებიდან.
ლია ჯაყელს ბევრი არ იცნობს, როგორც პოეტს და მთარგმნელს. “ადამიანის ხმა”-ც 80-90-იან წლებში თარგმნა და ლიტერატურული საქმიანობაც წარსულში დატოვა.
ღონისძიებაზე ასევე შედგება ლია ჯაყელის ფილმის ჩვენება “სადა ხარ ჩემო სულიკო”
გეპატიჟებით 24 სექტემბერს, 17:00 საათზე, ილია ჭავჭავაძის ლიტერატურის მუზეუმში, ი.ჯავახიშვილის #7-ში.
