დღეს, 22 ნოემბერს 14 ოქტომბრის სასტიკი თავდასხმის მსხვერპლი ტრანსგენდერი ქალი ზ.შ. საავადმყოფოში გარდაიცვალა.
ექიმების თქმით, გარდაცვალება სიცოცხლესთან შეუთავსებელმა ტრავმებმა გამოიწვია; მიზეზებთან დაკავშირებით დეტალური ინფორმაცია მოგვიანებით იქნება ცნობილი. ტრანსგენდერი ქალი საავადმყოფოში თავის ქალასა და ყელის არეში მიყენებული მრავლობითი დაზიანებებით 14 ოქტომბერს იქნა გადაყვანილი.
თავდამსხმელმა ზ.შ.-ს მძიმე ჭრილობები თავისა და ყელის არეში 14 ოქტომბერს, დღის 3-დან 4 საათის შუალედში, ორთაჭალის ტერიტორიაზე მიაყენა. სამართალდამცველებმა დანაშაულის ჩადენიდან მიმალვაში მყოფი ბრალდებული პირი 16 ოქტომბერს, ქ. რუსთავში დააკავეს სსკ-ის 19-108-ე მუხლით (განზრახ მკვლელობის მცდელობა).
თბილისის საქალაქო სასამართლოში ტრანსგენდერი ქალის მკვლელობის მცდელობაში ბრალდებული გ.მ-ის საქმეზე სასამართლო სხდომა 19 ოქტომბერს გაიმართა. პროცესზე სასამართლომ ბრალდებულის წინასწარ პატიმრობაზე პროკურატურის შუამდგომლობა დააკმაყოფილა. ამასთანავე, გადაწყდა, რომ საქმეზე წინასასამართლო სხდომა 8 დეკემბერს, 12 საათზე გაიმართება, რომელზეც გაირკვევა საქმე არსებითი განხილვისთვის უნდა გადაეცეს სასამართლოს თუ არა. პროკურატურამ დანაშაულის დამამძიმებელ გარემოებებში ჩადენის შესახებ ისაუბრა და განაცხადა, რომ საქმეში დანაშაულის სიძულვილით მოტივირება, შესაბამისად 53-ე მუხლის გამოყენების საჭიროება არ იკვეთება.
"ქალთა ინიციატივების მხარდამჭერი ჯგუფის" (WISG) იურისტები პროკურატურისგან მოითხოვენ საქმეში გამოყენებულიქნას 53-ე მუხლი. იურისტების თქმით, ის ფაქტი, რომ ბრალდებული დაზარალებულს იცნობდა, არ გამორიცხავს იმას, რომ დანაშაული სექსუალური ორიენტაციისა და გენდერული იდენტობის ნიშნით სიძულვილის ნიადაგზე იყოს ჩადენილი. შეგახსენებთ, სიძულვილით მოტივირება დანაშაულის დამამძიმებელი გარემოებაა.