დღეს, 10 თებერვალს თბილისის სააპელაციო სასამართლოში ტრანსგენდერი ქალის, საბი ბერიანის მკვლელობის საქმეზე მორიგი პროცესი უნდა გამართულიყო, თუმცა მოსამართლე მარინა ხოლოაშვილის ჯანმრთელობის მდგომარეობის გამო მოსამართლეთა კოლეგიამ პროცესი გადადო.

საბი ბერიანის საქმეზე შემდეგი პროცესი, რომელზეც სახელმწიფო ბრალდების მხარემ დასკვნითი სიტყვა უნდა წარმოთქვას, 16 მარტს 15 საათზე გაიმართება.

ტრანსგენდერი ქალი, საბი ბერიანი 2014 წლის 11 ნოემბერს საკუთარ ბინაში მოკლეს. 2015 წლის 7 აგვისტოს თბილისის საქალაქო სასამართლომ საბი ბერიანის მკვლელობაში ბრალდებული ლევან კოჭლოშვილი ნაწილობრივ გაამართლა.

კოჭლოშვილს სხვისი ნივთის დაზიანებისა (საბი ბერიანის ბინაში ხანძრის გაჩენის) და ტრანსგენდერი ქალის ბიანკა შიგუროვას ცემისთვის ჯამურად 4 წელი პატიმრობა შეეფარდა. ბერიანის განზრახ მკვლელობაში სასამართლომ კოჭლოშვილი უდანაშაულოდ ცნო.

2016 წლის 4 თებერვალს, საბი ბერიანის საქმის ერთ-ერთი მთავარი მოწმე, ტრანსგენდერი ქალი, ბიანკა შიგუროვა საკუთარ საცხოვრებელ ბინაში გაზის გაჟონვის შედეგად, ინტოქსიკაციით გარდაცვლილი იპოვეს.

ბიანკა შიგურვას საქმეს შინაგან საქმეთა სამინისტრო სსკ-ის 115-ე -თვითმკვლელობამდე მიყვანის მუხლით იძიებს.